Krishna - கண்ணன் வருகின்ற நேரம்

கண்ணன் வருகின்ற நேரம் - அவன்

குழலும் ஒலிக்கின்ற நேரம் - இனி

எண்ணம் அவன்மீது கூடும் - என்

இதயம் அவன்பெயரைப் பாடும்

நயனம் அவனழகைப் பருகும் - என்

நெஞ்சம் நெய்யாக உருகும் - அவன்

மயக்கும் தெய்வீக அழகில் - என்

மனதில் ஸ்ரீராகம் ஒலிக்கும்  -இந்த

கயிறு அரவாகும் பொழுதில் – அவன்

கண்கள் கவிதைகள் எழுதும்

(கண்ணன் வருகின்ற )

மடியில் தலைவைத்துக் கிடப்பேன் – கண்

மூடியே ராதைநான் நடிப்பேன் – என்

உடலோ அவன்கைகள் தேடும் – கனி

இதழோ இதழ்காண ஏங்கும் – என்னை

படிக்க நூல்போல பிரிப்பான் – அவன்

படித்த பின்னாலே சிரிப்பான்

(கண்ணன் வருகின்ற )

அவனைச் சேர்கின்ற பொழுது – என்

உயிரும் மலர்கின்ற பொழுது – ஒரு

கவலை இல்லாத இளமை – அவன்

கண்கள் என்றென்றும் புதுமை – ஒரு

உவமை இல்லாத உறவு – இனி

என்றும் கூடாது பிரிவு

(கண்ணன் வருகின்ற )